Шаҳрванди Тоҷикистон бо миқдори зиёди маводи мухаддири сахттаъсири героин дар марзи гумрукии Озарбойҷон дастгир шуд.

Бино ба иттилои Кумитаи давлатии гумруки Озарбойҷон, ахири ҳафтаи гузашта зимни азназаргузаронии автомашинаи боркаш тариқи дастгоҳи рентгенӣ дар пинҳонгоҳи он 141 килову 156 грамм маводи нашъаовари героин дарёфт шудааст. Автомашина таҳти идораи шаҳрванди Тоҷикистон Муҳаммадин Исмоилов қарор дошта, аз Эрон ба Озарбойҷон ворид шуданӣ будааст.

Гуфта мешавад, ҳангоми бозпурсиҳои нахуст ронадаи воситаи нақлиёт, шаҳрванди Тоҷикистон гуфтааст, бо транзит тариқи Озарбойҷон ба Гурҷистон рафтанӣ будааст.

Зимнан зикр мегардад, ки айни замон аз рӯи ин далел корҳои тафтишотӣ роҳандозӣ шудаанд.