Марди 26-солаи сокини шаҳри Душанбе, муҳофизи яке аз корхонаҳои хусусӣ ба мақомоти милитсия муроҷиат намуда, изҳор доштааст, ки як шахси номаълум ӯ ва се тан аз ҳамкоронашро мавриди лату кӯб қарор додааст.

Дафтари матбуоти ВКД Тоҷикистон дар ин робита менависад, ин шахс дар даромадгоҳи ҷойи корӣ бо олоти халандаю буранда ба пойи рости муҳофиз зарба зада, сипас  ҳамкоронаш, марди 30-сола ва 26-солаи сокинони шаҳри Душанберо низ зери лату кӯб қарор додааст, ки дар натиҷа ҷабрдидагон ҷароҳати ҷисмонӣ бардошта, дар беморхона бистарӣ гаштаанд.

Гуфта мешавад, зимни гузаронидани чорабиниҳои оперативӣ-ҷустуҷӯӣ кормандони милитсия ҳамчун гумонбар дар ин ҷинояти авбошӣ марди 26-солаи сокини шаҳри Душанберо, ки қаблан бо моддаи 237 Кодекси ҷиноятии Ҷумҳурии Тоҷикистон суд шудааст, дастгир намудаанд.

Зимнан зикр мегардад, ки нисбати гумонбаршуда парвандаи ҷиноятӣ оғоз гардида, тафтишоти ҳодиса идома дорад.