Кормандони Агентии назорати маводи нашъаовари Тоҷикистон ҳудуди 1 кило героинро дар Душанбе мусодира намуданд. Ба гумони даст доштан дар муомилоти ғайриқонунии маводи нашъаовар ду нафар боздошт шуданд.

Бино ба маълумоти дафтари матбуоти Агентӣ, як гурӯҳи гумонбар ба фурӯши маводи нашъаовар муддати дароз дар коркарди Агентӣ қарор доштанд, ки интиқоли онро аз ҳудуди ноҳияҳои наздисарҳадӣ ба шаҳри Душанбе  ва ба дигар шаҳру ноҳияҳои кишвар ба роҳ монда буданд.

“Ҳафтаи сипаригардида ҳангоми амалӣ намудани корҳои оперативӣ-ҷустуҷӯӣ дар ҳудуди маҳалаи 102-юми шаҳри Душанбе сокинон Саъдиҷон Сурхов ва Рустамҷон Мирзоев бо ҷурми нашъаҷаллобӣ дастгир гардиданд”, - омадааст дар маълумоти Агентӣ.

Гуфта мешавад, ҳангоми кофтукови шахсӣ аз дастгиршудагон як селофан, ки дар дохилаш як баста маводи зардчатоби буйи махсусдошта мавҷуд буд дарёфт ва гирифта шуд. Ташхис муайян кард, ки ин маводи героин ва вазнаш ҳудуди 1 килоро ташкил медиҳад.

Зимнан зикр мегардад, ки аз рӯи ҳодисаи мазкур бо моддаи 200 қисми 3-и Кодекси ҷиноятии ҶТ парвандаи ҷиноятӣ оғоз гардида, тафтишот давом дорад.

Ҳамчунин қайд мешавад, ки айни ҳол барои муайян ва боздошт намудани аъзоёни боқимондаи ин гурӯҳ, ки ба ҷинояти мазкур алоқамандӣ доранд, чораҳои зарурӣ андешида шуда истодааст.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.