Кормандони Раёсати ВКД дар шаҳри Душанбе дар пайи расидагӣ ба муроҷиати шаҳрванд Шаҳноза Қурбонова, сокини 17-солаи пойтахт Баҳриддин Абдураҳмоновро, ки ба сифати пулчин (кондуктор) дар микроавтобуси хатсайри № 15 кор мекунад, ба ҷавобгарӣ ҷалб намуданд.

Бино ба иттилои дафтари матбуоти РВКД дар Душанбе, шаҳрванд Шаҳноза Қурбонова дар саҳифаи Фейсбукии худ аз дағалрафтории як нафар ҷавонписари пулчин дар микроавтобус шикоят намуда, хостори андешидани чораи қонунӣ гардидааст.

Гуфта мешавад муайян гардидааст, ки дар ҳақиқат санаи 21-уми августи соли ҷорӣ ҳангоми фаъолияти корӣ дар микроавтобуси хатсайри №15 ҳангоми ба маҳаллаи Ховарон расидан, Абдураҳмонов нисбати ин ҷавонзани мусофир, ки бо ду фарзандаш қарор дошт, беэҳтиромӣ зоҳир намуда, бо алфози қабеҳ шаъну шарафашро дар байни дигар шаҳрвандон паст задааст.

Бо қарори суди ноҳияи Шоҳмансур Баҳриддин Абдураҳмонов барои майдаавбошӣ ба маблағи 385 сомонӣ ҷарима шуд.

Маводи мо бо суроғаҳои news.tj ё asiaplustj.info тариқи браузери Opera (ба кор даровардани VPN лозим аст) қобили дарёфт аст. Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.