Директори Корхонаи давлатии фаръии обтаъминкунӣ ва канализатсияи шаҳри Истаравшан Алӣ Алиев ба қаллобӣ гумонбар дониста мешавад.

Бино ба иттилои Агентии зиддифасоди ҷумҳурӣ, Алиев зимни фаъолияти кориаш бо роҳи фиреб ва суистифодаи боварӣ аз сокини маҳаллӣ барои хидматрасониаш маблағи калони пулӣ талаб кардааст.

“Ӯ барои ҳамчун намояндаи фармоишгар қабул намудани корҳои насбкунии обченкунакҳо ва таҷҳизоти пайвасткунӣ дар шаҳри Истаравшан аз шаҳрванд 14 ҳазор доллар гирифта, боз овардани 5 ҳазор сомонии дигарро талаб кардааст”, - омадааст дар хабари Агентӣ.

Гуфта мешавад, дар натиҷаи гузаронидани чорабиниҳои оперативӣ-тафтишотӣ Алӣ Алиев баъди аз шаҳрванд гирифтани 5 ҳазор сомонӣ дар утоқи кориаш дастгир ва маблағи мазкур ҳамчун далели шайъӣ ёфта гирифта шуд.

Зикр мегардад, ки оид ба ҳолати мазкур нисбати Алиев бо моддаи 247 қ. 4 банди “б” Кодекси ҷиноятии ҶТ парвандаи ҷиноятӣ оғоз гардида, баъди анҷоми тафтиши пешакӣ он бо тасдиқи фикри айбдоркунӣ барои моҳиятан баррасӣ намудан ба суд ирсол карда шуд.

Дар ин модда ҷазои аз 1460 то 2190 нишондиҳанда барои ҳисоб ҷарима ё маҳрумият аз озодӣ ба муҳлати аз 8 то 12 сол бо маҳрум кардан аз ишғоли вазифаҳои муайян ё машғул шудан ба фаъолияти муайян ба муҳлати то 5 сол ҷазо пешбинӣ шудааст.

Дар Telegram, Facebook, Instagram, OK ва ВК бо мо бимонед.