Мақомоти Русия як ширкатро барои муҳоҷирати ғайриқонунӣ, омода намудани ҳуҷҷатҳои қалбакӣ ва нопардохти андоз муттаҳам карда, 26 шаҳрванди Тоҷикистонро, ки дар он фаъолият доштанд, чун “шоҳид” боздошт ва пас аз панҷ ба Тоҷикистон хориҷ кардааст.

Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Русия дар сомонаи худ менависад, ки ихроҷи 26 муҳоҷири боздоштшудаи тоҷик баъди мулоқот бо роҳбари Маркази нигоҳдории муваққатии шаҳрвандони хориҷии Раёсати ВКД ва масъули Хадамоти федералии приставҳои судӣ дар вилояти Владимир имконпазир шудааст. Онҳо рӯзҳои 26 ва 28-уми сентябр ба Тоҷикистон бозгаштаанд.

Нисбати саҳомони ширкати СИ “Саломонов О”, ки муҳоҷирони ихроҷшудаи тоҷикро ба кор ҷалб карда, барояшон ҳуҷҷат таҳия карда буд, бо иттиҳоми муҳоҷирати ғайриқонунӣ, омода намудани ҳуҷҷатҳои қалбакӣ ва напардохтани андоз парвандаи ҷиноӣ боз шудааст.

“Ширкати мазкур, ки дар он то 2000 коргарони маҳаллӣ ва шаҳрвандони хориҷӣ ба корҳои чорводорӣ, сохтмон, гармхона, моҳипарварӣ, мурғпарварӣ, ҳасиббарорӣ ва ғайра машғул буданд, ҳуҷҷатҳои иҷозатдиҳандаи фаъолияти муҳоҷирон ва қайди муҳоҷиратиро қалбакӣ намудааст”, - зикр мешавад дар иттилоия.

Дар ҳамин ҳол, маълум нест, ки чаро барои кирдори ғайриқонуни саҳомони ширкати СИ “Саломонов О” муҳоҷирони тоҷик, ки “шоҳид” будаанд, ихроҷ шудаанд. Дар ҳоле ки онҳо низ фиребхӯрдаанд.

Ёдовар мешавем, ки наздики шаш моҳ инҷониб дар гӯшаву канори Русия рейдҳои зиддимуҳоҷирон идома дорад ва дар он садҳо шаҳрванди Тоҷикистон боздошт шуда, ҳуҷҷатҳояшон санҷида шудааст.

Ҷойҳое, ки кормандони мақомоти қудратии Русия рейд мегузаронанд, аслан ширкатҳои сохтмонӣ, бозор ва масҷидҳои ҷомеа мебошанд. Кормандони мақомоти интизомии Русия муҳоҷирони тоҷикро бештари вақт ба шеваи ғайримақбул ва дар баъзе ҳолат таҳқиромез боздошту латукӯб мекунанд.

Аммо мақомоти Тоҷикистон чунин бархӯрд ба муҳоҷирон тоҷиконро натиҷаи рейдҳои нақшавии мақомоти Русия унвон карда гуфтанд, “дурустии амалкарди мақомоти он кишварро мавриди шубҳа қарор намедиҳад”.

Аз ҷумла, Сироҷиддин Муҳриддин, вазири корҳои хориҷии Тоҷикистон афзуда буд, ки “Тоҷикистон дар ҳама сатҳҳо аз Русия талаб мекунад, ки зимни баргузории чорабиниҳои нақшавӣ ва ғайринақшавӣ ҳуқуқу озодиҳои заминавии муҳоҷирони меҳнатии Тоҷикистонро риоя кунад.

Қабл аз ин, Шаҳноза Нодирӣ, муовини вазири меҳнат, муҳоҷират ва шуғли аҳолии Тоҷикистон боздошту таъқиб ва фишорҳои охирро ба амалиёти махсуси “Нелегал”-и мақомоти қудратии Русия рабт дода буд.

Ҳоло низ хабарҳо дар бораи боздошту тафтиш ва дар баъзе ҳолат, озори муҳоҷирони тоҷик расонаӣ мешаванд.

Дар Telegram, Facebook, Instagram, OK ва ВК бо мо бимонед.