Додгоҳи олии Тоҷикистон Акмал Юсуфзода, подполковники пешини Раёсати мубориза бо ҷиноятҳои муташаккил (УБОП)-и ВКД-ро ба 19 сол ва Исмоилҷон Шукуров, хеши ӯро ба 12 соли зиндон маҳкум кардааст. Ҳар дуи онҳо ба рабудан ва қатли Исмоил Раҳмонов, омӯзгори Донишгоҳи давлатии тиҷорати Тоҷикистон гунаҳкор шудаанд.

Дар ин бора Радиои Озодӣ бо такя ба посухи хаттии дафтари матбуоти Додгоҳи олӣ иттилоъ медиҳад.

Ба навиштаи ин расона, ҳукми Акмал Юсуфзода ва Исмоилҷон Шукуров 28-уми феврали имсол содир шудааст.

Бояд гуфт, қаблан додситон барои Акмал Юсуфзода аз додгоҳ 20 сол зиндон хоста буд.

“Додрас Юсуфзодаро ба рабудан ва қатли Исмоил Раҳмонов, омӯзгори Донишгоҳи тиҷорат гунаҳкор донистааст. Ҳарчанд худаш ва вакили дифоаш гуфтанд, афсар нияти куштани омӯзгорро надошт”, - менависад Радиои Озодӣ.

Ин расона бо такя ба манбаи худ менависад, ки Юсуфзода бар асоси ду банди Кодекси ҷиноӣ одамрабоӣ бо маслиҳати пешакӣ (моддаи 130 қисми 2) ва куштор бо бераҳмии махсус (моддаи 104 қисми 2) гунаҳкор шудааст. Исмоилҷон Шукуров бошад, танҳо ба одамрабоӣ гунаҳкор шудааст.

Вокуниши пайвандони ин ду нафар ва ҳам наздикони омӯзгор Исмоил Раҳмонов ба ҳукми додгоҳ то ин лаҳза дастрас нест. Маълум нест, ки онҳо аз ҳукми додгоҳ то куҷо розианд.

Бояд гуфт, ки дар хусуси рабудани Исмоил Раҳмонов нахуст Радиои Озодӣ бо такя ба манбаъҳои худ гузориш дода буд.

Баъдтар Додситонии кулли кишвар хабар дод, ки Акмал Юсуфзода шаби 12-уми июни соли 2023, “бо нияти ҷазо додан”, Исмоил Раҳмоновро аз назди қурутобхонаи “Муслим”-и Душанбе рабуда, ба ноҳияи Айнӣ мебарад ва ба дарёи Фон мепартояд. Ҷасади омӯзгор то ҳол пайдо нашудааст. Сабаби ин ҳодиса ба гуфтаи додситон, рашки Юсуфзода аз мукотибаи ҳамсараш бо Исмоил Раҳмонов будааст. Аммо пайвандони омӯзгор гуфтанд, Исмоил Раҳмонов бо ҳамсари Акмал Юсуфзода дар Донишгоҳи тиҷорат танҳо ҳамкор буданд ва миёни онҳо ягон робитаи дигар ҷой надошт.

Дар Telegram, Facebook ва Instagram бо мо бимонед.