Пулиси Душанбе давоми ду рӯзи охир аз ду ҳолати газидани гӯши сокинони пойтахт аз сӯйи як мард ва ду духтар хабар дод. Ҳар ду ҳолат дар пайи муноқиша рух додааст.

Дар ҳолати якум, рӯзи 24-уми март, пулиси Душанбе аз боздошти як мард хабар дод, ки ба гуфтаи ин ниҳод, қисме аз гӯши як сокини пойтахтро газида, ҷудо кардааст. Ин ниҳод аз боздоштшуда Ғолибшо Ғоибов ном бурда, гуфтааст, ки сокини 33-солаи шаҳри Душанбе аст.

Ба гуфтаи манбаъ, ӯ дар кӯчаи А. Деҳотии ноҳияи Фирдавсӣ як марди 38-соларо латукӯб ва “тартиботи ҷамъиятиро дағалона вайрон кардааст”.

“Гумонбаршаванда аз ин қаноатманд нагардида, кирдори авбошонаи худро идома дода, бо дандонҳояш гӯши чапи шаҳрванд С.Қ.-ро газида, қисми болояшро канда ҷудо намудааст. Дар натиҷа, ҷабрдида ҷароҳати ҷисмонӣ бардошта, дар беморхона бистарӣ гардид”, - навиштааст пулиси пойтахт.

Назари Ғоибов дар робита ба ин қазия маълум нест. Алайҳи ӯ бо гумони авбошӣ (моддаи 237 КҶ) парвандаи ҷиноӣ боз шудааст. Ин иттиҳом аз ҷарима то 7 сол зиндонро пешбинӣ мекунад.

Дар бораи ҳолати дуюм, рӯзи 25-уми март пулис хабар дода, навишт, ки дар пайи нашри навори муноқишаи ду духтар бо як кирокаш ва рабуда шудани телефони ронанда ду гумонбари ноболиғон Н.О. ва М.С., сокинони 15-солаи шаҳри Душанбе, дастгир карда шуданд.

“Зимни санҷиш муайян гардид, ки номбурдагон санаи 23 марти соли ҷорӣ нисбати шаҳрванд Отаев Маҳмадёр — ронандаи воситаи нақлиёти мусофирбар, дағалона муносибат намуда, як адад телефони мобилии ҷабрдидаро рабудаанд. Ҳамзамон, ронандаро мавриди латукӯб қарор дода, гӯши рости ӯро газида, ба ӯ ҷароҳати ҷисмонӣ расонидаанд”, - навишт пулис.

Ба навиштаи ин ниҳод, пас аз ташхиси тиббӣ муайян карда шудааст, ки гумонбарон дар ҳолати мадҳушӣ қарор дошта, воситаҳои нашъадори навъи “Метамфетамин”, ба истилоҳ “Кристалл” истеъмол кардаанд.

Вобаста ба ҳолати мазкур маводҳои зарурӣ тартиб дода шуда, мавриди тафтишоти пешакӣ қарор дорад.

Пулис аз шаҳрвандон, махсусан падарону модарон, даъват карда, ки фарзандони худро бе назорат нагузоранд ва нисбат ба таълиму тарбияи онҳо бетафовут набошанд.

Дар Telegram, Facebook ва Instagram бо мо бимонед.