Душанбе. 3-юми июн. «Азия-Плюс» — | Президенти Ҷумҳурии Тоҷикистон Эмомалӣ Раҳмон Гурўҳи калони соҳибкорони Ҷумҳурии Исломии Покистонро, ки таҳти роҳбарии Раиси Идораи рушди иқтисод ва савдои Покистон Тариқ Иқбол Пурӣ тайи се рўз дар Тоҷикистон қарор доранд, ба ҳузур пазируфт.

 Тавре аз хадамоти матбуоти сарвари давлат хабар доданд, дар мулоқот масоили кунунӣ ва дурнамои рушди ҳамкории иқтисодӣ, тиҷоратӣ ва сармоягузории ду кишвар, аз ҷумла бо ҷалби васеи соҳибкорону тоҷирон баррасӣ гардид.

 Тариқ Иқбол Пурӣ нахуст ба Сарвари давлат Эмомалӣ Раҳмон доир ба натиҷаҳои мулоқоту сўҳбатҳои серўзаи гурўҳи 118 – нафараи соҳибкорону тоҷирони Покистон  бо роҳбарони мақомоти давлатию ҷамъиятӣ ва соҳибкории Тоҷикистон гузориш дод.

 Аз ҷумла зикр гардид, ки миёни сохторҳои гуногуни ду кишвар доир ба густариши ҳамкорӣ дар бахшҳои гидроэнергетика, зироаткорӣ, моҳипарварӣ, коркарди нахи пахта, пашму пўст, меваю сабзавот, истеҳсоли семент, рушди тиҷорати мутақобила ва дар соҳаи технологияҳои иттилоотӣ тавофуқоти зиёд ҳосил шуд. Доир ба бунёди як корхонаи нассоҷӣ барои коркарди нахи пахта то маҳсулоти  ниҳоӣ созишнома ба имзо расид.

 ҳарду ҷониб омодагӣ ва ҳавасмандии устувори худро доир ба густариши ҳамкории энергетикӣ, ба роҳ мондани интиқоли нерўи барқ аз Тоҷикистон ба Покистон ва таъмини робитаи доимию ногусастании ду кишвар аз тариқи роҳҳои заминию ҳавоӣ таъкид намуданд.

Гуфтугўи судманд, ҳамчунин доир ба густариши робитаҳои илмию фарҳангӣ, омўзишӣ ва атрофи дигар мавзўъҳои мавриди таваҷҷуҳ сурат гирифт.