Изҳороти президенти Белорус Александр Лукашенко бобати мувофиқи мақсад будани ҳайати Созмони аҳдномаи амнияти дастаҷамъиро тарк гуфтани Ӯзбекистон ҳеҷ аҳамияте надошта, ба сафари ӯ ба Тоҷикистон робита надорад, - гуфт дар мусоҳиба бо хабарнигори ОИ «Азия-Плюс» сиёсатшиноси мустақил Рустам Ҳайдаров.

Номбурда ба ин назар аст, ки ин изҳорот шояд бештар ба мустақар гардидани нерӯҳои низомии ИМА дар Ӯзбекистон вобаста бошад. «Аз ҳайати СААД хориҷ шудан ё шомил будани Ӯзбекистон ба он, дар муносиботи Тоҷикистону Ӯзбекистон ҳеҷ тағйиротеро ба вуқӯъ нахоҳад пайваст. Тамоми мушкилоти мавҷуда ҳамин тавр ҳалношуда боқӣ хоҳанд монд», - мегӯяд Ҳайдаров.

Дар идома сиёсатшинос изҳор кард, ки чун нерӯҳои низомии ИМА дар Ӯзбекистон ҷойгир шаванд, Тошканди расмӣ худаш ба хориҷ шудан аз СААД ташаббус нишон хоҳад дод.

«Дар минтақа Ӯзбекистон ягона кишварест, ки ИМА дар масъалаи мустақар сохтани нерӯҳои низомии худ метавонанд ба он такя намоянд ё эътимод дошта бошанд. Ман мӯътақидам, ки масъалаи дар Ӯзбекистон ҷойгир кардани нерӯҳои низомии ИМА аз ҷониби мақомоти раҳбарии кишвари ҳамсоя ба таври мусбат ҳал карда шудааст. Ин маънои онро дорад, ки идомаи сохтмони нерӯгоҳи «Роғун» дар Тоҷикистон ояндаи наздик бо хулосаи коршиносони Бонки ҷаҳонӣ, ки таҳти назорати ИМА қарор доранд, пурра қатъ карда мешавад», - афзуд Ҳайдаров.