Сафири Фавқулода ва Мухтори Федератсияи Россия дар Ҷумҳурии Тоҷикистон Юрий Попов ба Вазорати корҳои хориҷии Ҷумҳурии Тоҷикистон даъват карда шуд.

Тавре аз деапртаменти иттилооти Вазорати корҳои хориҷии ҷумҳурӣ иттилоъ доданд, зимни мулоқот масъалаи афзоиши теъдоди ҳодисаҳои содиршавии амалиёти зӯроварии золимона нисбати муҳоҷирони меҳнатии тоҷик, ки дар қаламрави Федератсияи Россия қарор доранд, муҳокима гардид.

Ба иттилои манбаъ, вазорат оид ба чунин ҳодисаҳо, ки вақтҳои охир рӯ ба афзоиш доранд, изҳори нигаронӣ намуд ва иброз дошт, ки куштори ваҳшиёнаи шаҳрвандони Тоҷикистон Расулов Бахтиёр Ғафорович ва Қурбонқулов Зокир Чориқулович хашму ғазаби тоҷикистониёнро овардааст.

Аз ҷониби Вазорат таъкид гардид, ки ин гуна воқеаҳо метавонанд пайомади маъракае, ки чанде қабл аз ҷониби баъзе шахсони ҷамъиятӣ ва расонаҳои хабарии Россия бар зидди муҳоҷирони меҳнатии Тоҷикистон пиёда шуда буд, бошанд ва зарурати хотима бахшидани ташаннуҷсозии вазъ дар ин мавзӯъ аз ҷониби ВАО-и Россия таъкид карда шуд.

Қайд гардид, ки чунин амалиёт метавонад ба болоравии ҳисси бадбинӣ дар ҷомеаи Тоҷикистон оварда расонад, ки ба муносибатҳои дуҷониба зарари ҷиддие расонида метавонад.

Изҳор карда шуд, ки ҷониби Россияро зарур аст, то оид ба ҷустуҷӯ ва ҷазо додани ҷинояткорон, ҳамчунин барои пешгирии чунин ҳодисаҳо дар оянда тадбирҳои қатъӣ андешад.

Сафири Россия итминон дод, ки ба роҳбарияти худ оид ба сӯҳбати доиргардида хабар мерасонад ва дар бораи чораҳои андешидашуда ва рафти тафтишот иттилоъ хоҳад дод.