Чанде қабл раиси Ҳизби наҳзати исломии Тоҷикистон  Муҳиддин Кабирӣ сафири Белгия дар Тоҷикистон ҷаноби Даниел Бертронро  бо хоҳиши ӯ ба ҳузур пазируфт.

Тавре аз қароргоҳи ҲНИТ хабар доданд, зимни сӯҳбат вазъи имрӯзаи кишвар ва минтақа, Афғонистон пас аз  берун рафтани нерӯҳои НАТО, авлавиятҳои ҲНИТ дар марҳалаи кунунӣ мавриди баррасӣ қарор гирифтанд. Муҳиддин Кабирӣ вазъи кишварро ором ва муътадил арзёбӣ намуда, мушкилоти мавҷударо қобили ҳал донист.

«Аз ҷумла қайд шуд, ки камтарин ҳаракати ноҷо метавонад боиси бузург нишон додан ва суйистифода аз тарафи нерӯҳои бегона ва фурсатталаб бошад, ки сулҳу оромиш ва ваҳдати миллии мо ба нафъашон нест. Авлавияти ҲНИТ ҳам дар ҳифзи суббот ва пешгирии ҳамагуна фитна дар заминаи ихтилофоти сиёсӣ ва мазҳабӣ мебошад», - иброз доштан дар қароргоҳи ҲНИТ.

Ба иттилои манбаъ, сафири Белгия ҷаноби Даниел Бертрон  Қайд намуд, ки кишвари Белгия дар минтақаи Осиёи Марказӣ манфиатҳои зиёди иқтисодӣ ва тиҷоратӣ надорад, вале барои ин кишвар амнияту суббот ва риояи ҳӯқуқ ва озодиҳои мардуми ин минтақа аз авлавиятҳо маҳсуб мешавад.