Эрон омода аст, ки ба Тоҷикистон баҳри раҳоӣ ёфтан аз буҳрони энергетикӣ кӯмак намояд, аммо Тоҷикистонро мебояд нахуст зербинои заруриро барои он омода созад.

«Эрону Тоҷикистон кишвари дӯсту бародар ва дорои забону фарҳанги ягонаанд ва мо ҳамеша омодаем, ки дар лаҳзаи мушкил ба ёрии дӯстонамон бишитобем», - гуфтанд ба ОИ «Азия-Плюс» дар сафорати Эрон дар Тоҷикистон.

Дар сафорат зикр карданд, ки барои пешниҳоди ин ё он кумак воситаи расонидани он зарур аст. «Айни замон интиқоли газу нафти Эрон ба Тоҷикистон ғайриимкон аст, зеро барои он лӯлаҳои интиқолӣ авҷуд нестанд», - таъкид доштанд дар намояндагии дипломатӣ ва илова намуданд, ки барои ноил гардидан ба ин имкон мутахассисони тоҷикро зарур аст, ки зерсохтори заруриро омода сохта, бо ҳамтоҳои эронии худ дар гуфтушунид бошанд.

Зимни вохӯрии чанде қабл доиргардидаи сарони кишварҳои Тоҷикистону Эрон ва Афғонистон дар Душанбе ҷонибҳо масъалаи сохтмони лӯлаи интиқоли газ миёни кишварҳоро баррасӣ карданд.

«Ҷониби Эрон ҳатто изҳор кард, ки хароҷоти қисмате аз сохтмон дар қаламрави Тоҷикистонро ба уҳдаи худ мегирад, аммо барои амалӣ гардидани ин тарҳ чандин сол зарур аст. Ба Тоҷикистон бошад, захираҳои энергетикӣ маҳз имрӯз заруранд. Аз ин рӯ, рӯйи тарзу воситаҳои дигари ба Тоҷикистон расонидани нафту гази Эрон ба Тоҷикистон мебояд ҷиддӣ андешаронӣ кард. Дар ҳама гуна ҳолат, Эрон Тоҷикистонро дастгирӣ хоҳад кард», - иброз доштанд дар сафорат.