Рӯзи 25-уми июл дар шаҳри Хоруғ роҳбари бахши Ҳизби наҳзати исломии Тоҷикистон дар Вилояти Мухтори Кӯҳистони Бадахшон Сабзалӣ Мамадризоеви 32-сола кушта шуд.

Тавре ба ОИ «Азия-Плюс» аз қароргоҳи ҲНИт хабар доданд, онҳо то ҳол дар бораи марги роҳбари бахш дар ВМКБ маълумоти дақиқ дар даст надошта, танҳо аз сарчашмаҳои ғайрирасмӣ аз он огаҳӣ пайдо кардаанд. Дар ҳамин ҳол, дар қароргоҳи ҳизб гуфтанд, аз замони оғози амалиёти низомӣ дар Хоруғ ӯ дигар бо онҳо дар тамос нашудааст.

Дар ҳамин ҳол, дар Youtube як наворе аз гирдиҳамойии Хоруғ гузошта шудааст, ки як рӯз қабл аз оғози амалиёти низомӣ баргузор шудааст ва дар он аён аст, ки яке аз суханронҳо Сабзалӣ Мамадризоев аст.

Сабзалӣ Мамадризоев аз моҳи июли соли 2011 ба бахши ҲНИТ дар ВМКБ роҳбарӣ мекард. То ин замон бахши ҲНИТ дар ВМКБ муддати як соли ахир пас аз марги нобаҳангоми собиқ раиси бахш Сироҷ Калонов бидуни роҳбар фаъолият дошт. Тамоми ин муддат ҲНИТ дар ҷустуҷӯйи номзади арзанда ба ин мансаб буд. Тибқи маълумот, ба аввали соли 2012 ба сафи ҲНИТ 3 ҳазор нафар сокинони ВМКБ шомиланд.

Акс аз навори видеоӣ дар интернет.