Бо даъвати сарвари давлати Тоҷикистон Эмомалӣ Раҳмон санаи 5-уми октябр президенти Русия Владимир Путин ба Душанбе ташриф меорад. Дар ин бора хадамоти матбуоти Кремл хабар медиҳад.

«Дар ҷараёни музокирот сарони кишварҳои Русияву Тоҷикистон доираи фарохи масоили ҳамкории дуҷониба дар бахшҳои иқтисоду савдо, амнияту робитаҳои гуманитарӣ, ҳамкориҳо дар иттиҳоду созмонҳои ҳамгироӣ ва дигар масоили мавриди таваҷҷуҳи тарафайнро баррасӣ карда, атрофи вазъи минтақаву ҷаҳон табодули назар хоҳанд кард», - гуфта мешавад дар иттилоъ.

Аз рӯйи натоиҷи гуфтушунидҳо имзои як қатор асноди ҳамкории дуҷониба дар назар аст. Дар иттилоъ зикр мегардад, ки ин вохӯрии дуюми сарони кишварҳои Русияву Тоҷикистон дар соли ҷорӣ аст.

Дар ҳамин ҳол, ҳафтаи гузашта муовини аввали нахуствазири Русия Игор Шувалов аз Тоҷикистон боздид намуда, пас аз анҷоми сафар изҳор дошта буд, ки муҳлати имзои созишнома дар бораи ҳузури пойгоҳи низомиии Русия «хеле наздик» буда, «ҳалли ниҳоии масъалаи мазкурро сарони кишварҳои Русияву Тоҷикистон ҳаллу фасл хоҳанд кард».

Ёдрас мекунем, ки 5-уми октябр президенти Тоҷикистон 60-солагии худро ҷашн мегирад ва баъди 2 рӯз, яъне 7-уми октябр бошад, Владимир Путин низ ба синни 60-солагӣ мерасад.