Чанде қабл дар шаҳри Истамбули Туркия мулоқоти Консули генералии Тоҷикистон Илҳом Абдурахмонов бо раиси шаҳри Истамбул Кадир Топбаш баргузор гардид.

Тавре аз Вазорати корҳои хориҷии ҷумҳурӣ иттилоъ доданд, дар оғози мулоқот раиси шаҳри Истамбул аз таърих ва дастовардҳои имрӯзаи Истамбул дар соҳаҳои гуногуни шаҳрдорӣ ёдовар шуда, пешравиҳои назаррасро дар соҳаҳои нақлиёт, туризм, экология, ободонӣ ва хоҷагии коммуналӣ таъкид сохт.

Консули генералӣ вусъат додани ҳамкориҳои мутақобилан судманд ва андӯхтани таҷрибаи пешрафтаи ин шаҳри бузургро аз ҷониби мақомотҳои дахлдори шаҳру минтақахои мухталифи Тоҷикистон мувофиқи мақсад шуморид.

Ҳамзамон Консули генералӣ дар робита ба табодули таҷриба миёни шаҳри Истамбул ва шаҳри Душанбе дар соҳаҳои фарҳангу маориф, туризм, нақлиёт, инчунин андешидани чораҳои муассир оиди ҷалби соҳибкорон баҳри ҳамкориҳои муштарак ибрози андеша намуд.

Ҷонибҳо изҳори омодагӣ карданд, ки ҷиҳати густариши робитаҳои самараноки корӣ ва тавсеаи минбаъдаи ҳамкориҳои гуногунсоҳа, инчунин ташвиқи бештари сармоягузории ҷониби Туркия ба Тоҷикистон муштаракан амал хоҳанд намуд.