Зимни суханронӣ дар Донишгоҳи Ҷорҷ Вашингтон раиси Ҳизби наҳзати исломии Тоҷикистон, вакили палатаи поёнии парлумони ҷумҳурӣ Муҳиддин Кабирӣ изҳор кард, ки айни замон ҷавонон ва занони кишвар ҳарчи бештар ба ҲНИТ таваҷҷуҳ зоҳир месозанд.

Тавре ба ОИ «Азия-Плюс» як манбаъ аз ҲНИТ хабар дод, М.Кабирӣ дар суханронии худ ҳамчунин қайд кардааст, ки феълан шумори аъзои ҲНИТ 42 ҳазор нафарро ташкил дода, беш аз 50 дарсади онро занон ташкил медиҳанд.

Раиси ҲНИТ ба донишҷӯёни мактаби олии маъруфи Амрико иттилоъ дод, ки зимни амалиёти низомии нерӯҳои ҳукуматӣ дар Хоруғ пас аз қатли генерали КДАМ Абдулло Назаров (21 июл) 70 нафар ба ҳалокат расида, пас аз он амалиёт фишор рӯи аъзои ҲНИТ шиддат ёфт ва то ҳанӯз идома дорад.

«М.Кабирӣ изҳор намуд, ки имрӯз ҲНИТ дар ҷомеаи Тоҷикистон нақши муътадилсози вазъро мебозад ва ин андешаи шахсии ӯ набуда, коршиносон низ бар ин назаранд, ки мегӯянд: ба туфайли фаъолияти қонунии ҲНИТ ҷавонони ба сиёсат таваҷҷуҳдошта на ба созмонҳои ифротгаро, балки маҳз ба ин ҳизб рӯ меоваранд», - гуфт манбаъ.

Дар ҷараёни сафар ба ИМА раиси ҲНИТ Муҳиддин Кабирӣ имрӯз дар Маркази исломии шаҳри Ню-Йорк бо тоҷикони муқими ин шаҳр мулоқот анҷом медиҳад.