Президенти Шӯрои Кантонҳо (палатаи болоии парлумон)-и Швейтсария Ханс Алтер бори нахуст бо сафари серӯза ба Тоҷикистон ташриф овард.

Тавре ба ОИ «Азия-Плюс» як манбаъ аз Маҷлиси миллии Маҷлиси Олии ҶТ хабар дод, нимаи аввали имрӯз дидору гуфтушуниди Ханс Алтер бо ҳамтои тоҷики худ – раиси палатаи болоии парлумони Тоҷикистон Маҳмадсаид Убайдуллоев баргузор мегардад.

Нимаи дуюми рӯз Ханс Алтерро вазири корҳои хориҷии ҷумҳурӣ Ҳамрохон Зарифӣ ва президенти Тоҷикистон Эмомалӣ Раҳмон ба ҳузур хоҳанд пазируфт.

Ба иттилои манбаъ, пагоҳ вохӯрии раиси палатаи болоии парлумони Швейтсария бо раиси Ҳизби наҳзати исломии Тоҷикистон дар назар буда, Ханс Алтер ҳамчунин аз Донишгоҳи давлатии тиббии Тоҷикистон боздид мекунад.

Зимнан зикр гардид, ки рӯзи 3-юми ноябр Ханс Алтер ҳамроҳи вазири тандурустии ҷумҳурӣ Нусратулло Салимов дар маросими ифтитоҳи Маркази омӯзиши малакаҳои амалии тиббӣ дар Душанбе ширкат варзида, бо фаъолияти Маркази исломии Тоҷикистон шинос мешавад.