Чанде қабл дар пойтахти Қирғизистон – шаҳри Бишкек мулоқоти ҳайати Тоҷикистон таҳти сарварии вазири корҳои хориҷӣ Ҳамрохон Зарифӣ бо вазири корҳои хориҷии Қирғизистон Эрлан Абдилдаев баргузор шуд.

Бино ба маълумоти Вазорати корҳои хориҷии ҷумҳурӣ, дар мулоқот маҷмӯи васеи масоили ҳамкориҳои дуҷониба, аз ҷумла дар бахшҳои иқтисоду савдо, нақлиёт, истифодаи захоири обӣ, энергетика ва фарҳанг мавриди баррасӣ қарор гирифта, ҷонибҳо атрофи густариши минбаъдаи онҳо табодули назар карданд.

Ба иттилои манбаъ, дар ҷараёни мулоқот ҳамчунин ба масъалаи аломатгузорӣ миёни марзҳои давлатии кишварҳо таваҷҷуҳ зоҳир шуд.

Зимнан зикр гардид, ки ҷонибҳо аз сатҳи кунунии муносибатҳои дуҷониба изҳори қаноатмандӣ карда, оид ба роҳандозии механизми мунтазам амалкунандаи ҳамкории мутақобила миёни вазоратҳо ибрози назар намуданд.