Чанде қабл президенти Тоҷикистон Эмомалӣ Раҳмон, ки феълан бо сафари расмӣ дар Туркия қарор дорад, ба муносибати фаро расидани Рӯзи истиқлолияти Қазоқистон ба унвони сарвари ин кишвар Нурсултон Назарбоев барқияи шодбошӣ ирсол намуд.

Бино ба маълумоти хадамоти матбуоти сарвари давлат, дар барқия таъкид мешавад, ки Тоҷикистон муносибатҳои дӯстонаи анъанавии миёни мамлакат ва халқҳои ду кишварро қадр карда, барои таҳкиму густариши онҳо тамоми имконотро истифода хоҳад намуд.

Президенти Тоҷикистон Эмомалӣ Раҳмон ҳамчунин ба президенти Иёлоти Муттаҳидаи Америка Барак Ҳусейн Обама дар робита ба дар мактаби Сендихуки иёлоти Коннектикут аз дасти як ҷинояткори нохалаф ба ҳалокат расидани бисту ҳафт нафар мактаббачагон барқияи таъзия ирсол кард.

«Ин хабари мудҳиш бори дигар собит сохт, ки тамоми аҳли башар бояд дастиҳам гирифта, бо ҳар гуна зуҳуроти зӯроварӣ ва таҷовуз ба ҳуқуқи инсон, ки зимни он ҳуқуқ ба ҳаёт аз муҳимтарин рукнҳои он аст, муборизаи беамон барад», - зикр мегардад дар барқия.