Зимни нишасти хабарии имрӯза вазири корҳои хориҷии Тоҷикистон Ҳамрохон Зарифӣ изҳор намуд, ки масъалаи ба иҷораи Русия додани фурудгоҳи низомии Айнӣ пас аз амалисозии мувофиқаҳои ҳосилшуда миёни кишварҳо, ки зимни сафари президенти Русия Владимир Путин моҳи октябри соли гузашта ба Душанбе  ба даст омада буданд, баррасӣ хоҳад шуд.

«Моро ҳоло лозим аст, ки созишномаҳо дар бахши муҳоҷирати меҳнатӣ, таҳвили маҳсулоти нафтии Русия ба Тоҷикистон бидуни боҷи содиротӣ, иштироки Русия дар лоиҳаҳои гидроэнергетикии ҷумҳуриро ба имзо расоем ва ҳамчунин Созишномаи шароити будубоши пойгоҳи низомии Русия дар қаламрави Тоҷикистон бояд дар парлумон тасдиқ шавад ва сипас метавон масъалаи фурудгоҳи Айниро мавриди баррасӣ қарор дод», - гуфт Ҳ.Зарифӣ.

Дар идома вазир зикр кард, ки зимни гуфтушуниди чанде қабл дар Душанбе анҷомёфта бо вазири корҳои хориҷии Русия Сергей Лавров, ҳарду ҷониб аз ҷараёни таҳияи Созишномаҳо дар бораи муҳоҷират ва таҳвили маҳсулоти нафтӣ изҳори қаноатмандӣ кардаанд.

Қобили зикр аст, ки солҳои шӯравӣ дар фурудгоҳи Айнии воқеъ дар наздикии шаҳри Душанбе корхонаи таъмири чархболҳо амал мекард. Баъди таъмири фурудгоҳ аз ҷониби Ҳиндустон ба маблағи ҳудуди 70 млн. доллари ИМА, акнун фурудгоҳ тамоми навъҳои ҳавопаймоҳоро қабул карда метавонад.

Бино ба изҳороти чандинкаратаи мансабдорони воломақоми низомии Русия, ин кишвар ба фурудгоҳи Айнӣ таваҷҷуҳи зиёд дорад.