Ба ифтихори 20-умин солгарди таъсиси Қувваҳои Мусаллаҳи Тоҷикистон ташкилоти ҷамъияти ҷавонони «Созандагони Ватан»-и ҲХДТ дар муассисаҳои томактабии шаҳри Душанбе ва вилоятҳои Суғду Хатлон таҳти унвони «Сарбоз аз нигоҳи кӯдакон» озмун гузаронида истодааст.

Тавре ба ОИ «Азия-Плюс» роҳбари Маркази таблиғот ва таҳлили ҲХДТ Адҳам Мирсаилов иттилоъ дод, чанде қабл дар кӯдакистони №135-и ноҳияи Фирдавсӣ ва кӯдакистонҳои №34 ва №67-и ноҳияи Шоҳмансури пойтахт натоиҷи озмун ҷамъбаст гардиданд. «Дар озмун кӯдакон аз нигоҳу тахайюлоти худ расмҳои ҷолибу зебо кашида, ба онҳо аз ҷониби ҳизб тӯҳфаҳо тақдим гардид», - гуфт вай.

Ба қавли ӯ, ба ифтихори 20-умин солгарди таъсиси Қувваҳои Мусаллаҳи ҶТ ҳамчунин чанде қабл намояндагони ҲХДТ таҳти сарварии муовини раиси ҳизб Асрор Латифов бо сарбозону афсарони Гвардияи муллии кишвар вохӯрда, ба пешқадамони хизмати ҳарбӣ туҳфаҳои хотиравӣ тақдим намуданд.