Чанде қабл зимни мулоқоти вазири молияи ҶТ Сафаралӣ Наҷмиддинов бо намояндаи доимии Созмони Оғо Хон оид ба рушд (AKDN) дар ҷумҳурӣ Алӣ Песнани масоили вазъи кунунӣ ва дурнамои ҳамкориҳои дуҷониба мавриди баррасӣ қарор гирифтанд.

Бино ба иттилои Вазорати молияи ҶТ, дар ҷараёни мулоқот ба ҷараёни амалисозии лоиҳаву барномаҳои муштарак дар бахши гидроэнергетика, кишоварзӣ, сохтмони роҳу пулҳо, тандурустӣ, маориф ва ҳифзи иҷтимоии аҳолӣ таваҷҷуҳи хосса зоҳир шуд.

Ҷонибҳо зарурати густариши шабакаи муассисаҳои маблағгузории хурд, бахусус дар манотиқи кӯҳистон ва дурдастро таъкид намуданд, ки бевосита ба сатҳи афзоиши некӯаҳволии мардум ва коҳиши мизони камбизоатӣ таъсир мерасонад.

Вазири молияи ҷумҳурӣ изҳори боварӣ намуд, ки минбаъд низ муносибатҳои Тоҷикистону AKDN бемайлон густариш хоҳанд ёфт.

Ёдрас мекунем, ки ахири моҳи гузашта Акбар Али Песнани ба сифати намояндаи нави доимии Созмони Оғо Хон оид ба рушд дар Тоҷикистон ба фаъолият шурӯъ намуд. Дар ин вазифа ӯ Мунир Мералиро иваз кард, ки санаи 28-уми январ ваколатҳои 7-солааш дар Тоҷикистон ба итмом расиданд.