Дар ҷараёни сафари корӣ ба Тоҷикистон ёвари Котиби давлатии ИМА оид ба Осиёи Марказӣ ва Ҷанубӣ Роберт Блейк бо рӯзноманигорон мулоқот орост.

Дар оғоз Роберт Блейк изҳор намуд, ки зимни мулоқот бо сарвари давлати Тоҷикистон ӯ ба Эмомалӣ Раҳмон барои дастгирии ташаббусҳо ҷиҳати таъмини субот дар Афғонистон ва ҳамчунин пуштибонӣ аз тамоми кӯшишҳои аз ҷониби эътилоф суратгирифта баҳри таъмини субот дар минтақаи Осиёи Марказӣ изҳори миннатдорӣ намудааст.

«Зимни мулоқот бо Эмомалӣ Раҳмон масоили густариши муносибатҳои дуҷонибаи ҳамкорӣ дар бахши таҳкими марзҳо, мубориза бо муомилоти ғайриқонунии маводи мухаддир ва терроризм мавриди баррасӣ қарор гирифтаанд», - иброз дошт вай.

Номбурда гуфт, дар ҷараёни машваратҳои сиёсӣ миёни Тоҷикистону ИМА бо вазири корҳои хориҷии ҶТ Ҳамрохон Зарифӣ масоили ҳамкориҳои дуҷониба, рушди иқтисоду тиҷорат, таъмини фазои мусоиди сармоягузорӣ, вазъи ҳуқуқи инсон бо шумули озодии васоити ахбори умум, дин ва мазҳаб, амнияти сарҳад ва мубориза бар зидди маводди мухаддир мавриди баррасӣ қарор гирифтанд.

Зимни посух ба саволи рӯзноманигорон дар мавриди мубориза бо муомилоти ғайриқонунии маводи мухаддир дар Афғонистон намояндаи департаменти давлатии ИМА иброз дошт, ки коҳиши истеҳсоли маводи нашъаовар дар Афғонистон яке аз масъалаҳои афзалиятнок барои ИМА маҳсуб меёбад. «Фаъолияти худро дар минтақа дар ин самт мо идома медиҳем. Дар масъалаи қочоқи маводи мухаддир мо бо Тоҷикистон як қатор чораҳои муштарак меандешем», - таъкид дошт ӯ.

Дар мавриди савол оид ба маъракаи интихоботи президентии Тоҷикистон ӯ изҳор намуд: «Мо ҷонибдори онем, ки тамоми аҳзоби сиёсӣ дар маъракаи интихоботи президент ширкат варзанд ва ИМА аз ҳукуматдорони тоҷик даъват мекунад, ки баргузории интихоботи мунсифона ва шаффофро таъин намоянд».

Номбурда ҳамчунин зикр кард, ки ИМА рӯйи масъалаи пас аз соли 2014 аз ҷониби ҳукумати Афғонистон таҳти назорат қарор додани вазъ тадбирҳо меандешад. «Барои мақомоти ҳифзи ҳуқуқи Афғонистон давраҳои омӯзишӣ ташкил намуда, метавонам бигӯям, ки 80%-и хизматчиёни низомии Афғонистон ба мустақилона таъмин кардани амнияти кишвари худ омодаанд», - афзуд Р.Блейк.