Чанде қабл вазири корҳои хориҷии Тоҷикистон Ҳамрохон Зарифӣ нусхаи Эътимодномаи сафири навтаъйиншудаи Конфедератсияи Швейтсария дар Тоҷикистон бо иқоматгоҳаш дар шаҳри Остона ҷаноби Мауро Рейнаро ба ҳузур пазируфт.

Бино ба маълумоти департаменти иттилооти Вазорати корҳои хориҷии ҷумҳурӣ, пас аз маросими расмии супоридани эътимодномаҳо вохӯрии вазири корҳои хориҷӣ бо сафири Швейтсария барпо гардид.

Дар оғози мулоқот вазири корҳои хориҷӣ роҷеъ ба сатҳи муносибатҳои дуҷонибаи Тоҷикистону Швейтсария изҳори қаноатмандӣ намуда, сипоси хешро оид ба дастгирии раванди шомилшавии Тоҷикистон ба СУС баён кард.

Вазири корҳои хориҷӣ нақши фаъоли Швейтсарияро дар амалисозии барномаҳои кӯмак ва рушд дар Тоҷикистон зикр намуда, иқтидори бузурги рушди ҳамкориҳои дуҷониба дар соҳаҳои гуногунро қайд намуд. Яке аз самти ҳамкориҳо Вазир тадқиқоти пиряхҳоро, ки дар Помир ҷойгиранд, номид. Ҳамкорӣ дар ин соҳа барои манфиати на танҳо Тоҷикистон, балки тамоми минтақа хоҳад буд.

Дар навбати худ сафир Мауро Рейна Вазири корҳои хориҷиро доир ба сафари ҷории ҳайати иқтисодии Швейтсария ҷиҳати иштирок дар Ҷаласаи нахустини Комиссияи муштарак оид ба савдо ва ҳамкориҳои иқтисодӣ, ки 5-6 марти соли ҷорӣ барпо мегардад, маълумот дод.

Дар анҷоми сӯҳбат ҷонибҳо ҳамкориҳои ду кишвар дар чорчӯбаи созмонҳои байналмилалӣ мисли СММ ва САҲА, ва инчунин имкониятҳои минбаъдаи тавсеаи онҳоро муҳокима намудаанд.