Ба эътиқоди вакили парлумон раиси ҲКТ Шодӣ Шабдолов, маъракаи интихоботи ба рӯзи 5-уми май таъиншудаи вакили МН МО ҶТ ба ҷойи вакили хориҷшуда Рустам Латифов аз ҳавзаи интихоботии якмандатии №39-и Восеъ як навъ имтиҳонест барои сохторҳои давлатӣ ва аҳзоби сиёсии ҷумҳурӣ дар пешорӯи маъракаи интихоботи президентӣ дар тирамоҳи соли равон.

«Аз рӯи натоиҷи интихобот дар Восеъ метавон пешакӣ ба хулосаҳое расид, ки оё ҳукуматдорон шаффофият ва ба таври демократӣ гузаштани интихоботи сарвари давлатро таъмин карда метавонанд ё на», - андеша меронад Шабдолов.

Дар ҳамин ҳол, ӯ изҳори шубҳа намуд, ки то ба қонунгузории интихобот ворид нашудани тағйирот, ки мувофиқи он намояндагони аҳзоби сиёсӣ бояд ба узви комиссияҳои минтақавӣ шудан ҳуқуқ пайдо кунанд, дар бораи шаффофияти интихобот сухан гуфтан ҳанӯз барвақт аст.

«Лекин як чиз мусаллам аст – маъракаи интихоботи вакили МН МО ҶТ аз ҳавзаи интихоботии якмандатии №39-и Восеъ як маҳаке хоҳад буд барои интихоботи президентӣ дар кишвар», - мутмаин аст раиси ҲКТ.

Ба гуфтаи вай, Ҳизби коммунист ба маъракаи интихоботи мазкур номзади худро пешниҳод карданист ва изҳори боварӣ намуд, ки дар соли интихоботи президентӣ қариб тамоми аҳзоби сиёсӣ аз имкони қувваозмоӣ дар Восеъ истифода хоҳанд кард.

Ёдрас мекунем, ки санаи 18-уми феврал бо фармони сарвари давлат, намояндаи Ҳизби агарарии Тоҷикистон дар МН МО ҶТ Рустам Латифов раиси ноҳияи Восеи вилояти Хатлон таъин карда шуд ва мувофиқи қонунгузории Тоҷикистон, Рустам Латифов баъди ин таъинот ваколатҳои худро дар палатаи поёнии парлумон пеш аз муҳлат супурд.