Раиси Ҳизби умумимиллии сотсиал-демократии Тоҷикистон Раҳматилло Зойиров оид ба бедарак шудани раиси ташкилоти ҷамиятии ӯзбекони вилояти Хатлон Салимбой Шамсиддинов хабар дод.

Дар муроҷиати худ ба унвони Ваколатдор оид ба ҳуқуқи иснони ҶТ Зариф Ализода, раиси КДАМ Саймумин Ятимов ва вазири корҳои дохилии ҷумҳурӣ Рамазон Раҳимов раиси ҲУСДТ изҳори итминон кардааст, ки бедарак шудани раиси ташкилоти ҷамъиятии ӯзбекони вилояти Хатлон ангезаи сиёсӣ дорад.

Дар изҳорот Р.Зойиров хабар медиҳад, ки С.Шамсиддинов ду рӯз пеш дар Қӯрғонтеппа субҳ ҳангоми машғул будан ба давидан боздошт шуда, имрӯз макони будубоши ӯ маълум нест, аммо раиси ҲУСДТ аз эҳтимол дур намедонад, ки С.Шамсиддинов барои ҳамкорӣ бо ӯ аз ҷониби кормандони КДАМ боздошт ва ба Душанбе оварда шудааст.

«Дарвоқеъ ҳам мо бо ӯ ҳамкорӣ доштем. Ҳамчун раиси Консорсиуми ҳуқуқии Тоҷикистон моҳи ноябри соли 2012 ман ба конфронси ҷамоати ӯзбекон дар Қӯрғотеппа даъват шуда будам. Дар конфронси мазкур бо иштироки намояндаи ҳокимияти давлатии шаҳр дар бораи ҳамкории ҳуқуқии Ташкилоти ҷамъиятии вилоят  бо консорсиум қарор қабул шуд. Пас аз ин тасмим гирифта шуд, ки бо назардошти ҳуқуқшинос будани С.Шамсиддинов, ӯ аз 1-уми марти соли 2013 намояндаи Консорсиуми ҳуқуқӣ дар Қӯрғонтеппа хоҳад шуд», - баён мегардад дар изҳороти Р.Зойиров.

Дар идома ӯ зикр мекунад, ки 12-уми январи соли 2013 С.Шамсиддинов дар Душанбе ҳамчунин дар кори мизи гирди Кумитаи эътилоф оид ба ворид намудани тағйирот ба қонуни интихоботи президент низ ширкат варзидааст.

Ба қавли Зойиров, зимни суҳбати телефонӣ бо С.Шамсиддинов рӯзи 15-уми март онҳо баъзе аз лаҳзаҳои кориро баррасӣ намуда, сипас Шамсиддинов изҳор кардааст, ки мақомоти ҳифзи ҳуқуқ ӯро мавриди фишор қарор додаанд.

«С.Шамсиддинов узви ҲУСДТ набуда, муносибатҳои мо ҷанбаи ҳуқуқӣ доштанд, вале акнун ҷанбаи сиёсӣ касб карданд. Дар ин робита ман маҷбурам, ки натанҳо ҳамчун раиси Консорсиуми ҳуқуқӣ, балки ҳамчун раиси ҳизби сиёсӣ амал намуда, изҳор намоям, ки баъди аз ҷониби ташкилоти сабтиномнашудаи Ҳаракати миллӣ пешниҳод шудани Р.Зойиров ба ҳайси номзади ягона ба мансаби президенти ҷумҳурӣ, фишор болои С.Шамсиддинов пурзӯртар карда шуд», - менависад дар изҳорот Р.Зойиров.

Дар муроҷиат Р.Зойиров бо такя ба моддаи 5-и Конститутсияи ҶТ аз мансабдорони масъули давлатӣ дархост намудааст, ки ҷиҳати ошкор кардани макони будубоши С.Шамсиддинов ва ҳифзи ҳуқуқҳои ӯ дар доираи Конститутсия ва дигар қонунҳо чора андешанд.