Ноиби нахуствазири Русия Дмитрий Рогозин ба журналистон изҳор намуд, ки аллакай аз ҳамин сол Русия вуруди шаҳрвандони кишварҳои узви ИДМ ба Русияро танҳо бо шиносномаи хориҷӣ иҷоза хоҳад дод.

Бино ба маълумоти НТВ, дар ин маврид Д.Рогозин ба назорат дар равуои қатораҳо аз Тоҷикистон таваҷҷуҳи бештар зоҳир намудааст.

Зимни боздид аз истгоҳи Ақсарайски вилояти Астрахан ӯ бо вазъи иншооти хадамоти марзбонӣ ва гумрук ошно гардида, ҳамроҳи роҳбари Роспотребнадзор Геннадий Онишенко бо вазъи қатораи Душанбе-Маскав низ шинос шудаанд.

Геннадий Онишенко аз вазъи хеле бади зиддисанитарии вагон-тарабхонаи қатора барошуфтааст, зеро ӯ дар паҳлӯи зарфҳо хобидани кормандони ҳайати қатораро мушоҳида кардааст.

«Тамоми зарфҳо бояд иваз шуда, умуман вагон бояд аз ҳайат гирифта шавад», - гуфтааст ӯ ба Рогозин. «Чӣ тавр метавон бидуни яхдон ба сафар баромада, ғизо тайёр кард?», - изҳори норозигӣ кардааст Онишенко. Ӯ хамчунин таваҷҷуҳи Рогозинро ба он равона кардааст, ки дар вагон-тарабхона барои кормандони ҳайати қатора ҷойҳои хуфту хоб омода шудаанд. «Ҳамааш фаҳмо», - гуфтааст дар посух Рогозин.

«Мардум ба кишвари мо тавассути қатораҳое меоянд, ки барои мусофиркашӣ пешбинӣ нашудааст», - иброз доштааст Рогозин ба рӯзноманигорон. Рогозин таъкид доштааст, ки «ин масъаларо ба гунае ҳал мебояд кард». «Мо шаҳри бедарвоза нестем», - зикр кардааст номбурда.

Ноиби нахуствазири Русия зарурати таҳкими назорати қатораҳои аз ин самт ба Русия воридмешударо таъкид намудааст.