Президенти Тоҷикистон Эмомалӣ Раҳмон ба президенти Иёлоти Муттаҳидаи Амрико Барак Ҳусейн Обама барқияи тасаллият ирсол намуд.

Бино ба маълумоти хадамоти матбуоти сарвари давлат, дар барқия Эмомалӣ Раҳмон таъкид месозад, ки аз шунидани хабари ҳузнангез дар бораи марги даҳҳо одамон бар асари таркиш дар корхонаи истеҳсоли нуриҳо дар иёлати Техаси Иёлоти Муттаҳидаи Амрико хеле андуҳгин аст.

«Дар ин лаҳзаҳои ҳузнангез хоҳиш менамоям, ки тасаллияти амиқ ва эҳсосоти ҳамдардии мардуми Тоҷикистонро ба хешовандону пайвандони ҳалокшудагон расонед, инчунин таманниёти ҳарчи зудтар шифо ёфтани ҳамаи зарардидагонро қабул фармоед», - гуфта мешавад дар барқия.

Ёдрас мекунем, ки бар асари таркиши шадид дар корхонаи истеҳсоли нуриҳои шаҳри Вакои иёлати Техаси ИМА рӯзи 18-уми апрел 14 нафар ҳалок ва беш аз 200 нафар ҷароҳат бардоштанд. Таркиш ҳамчунин қариб 100 адад биноро хароб намуд.