Дар маркази маъмурии вилояти Суғд - шаҳри Хуҷанд конфронси навбатии ҳисоботиву интихоботии шуъбаи шаҳрии ҲНИТ баргузор гардида, ҳайати нави раёсат интихоб шуд.

Бино ба иттилои сомонаи расмии ҲНИТ, дар конфронс аз 40 нафар вакили даъватшуда 28 нафар иштирок доштанд.

«Пас аз шунидани ҳисоботи мақомоти раҳбарии бахши шаҳрии ҲНИТ ҳайати раёсати шуъбаи ҲНИТ дар шаҳри Хуҷанд дар ҳайати 11 нафар интихоб шуд, ки 3 нафарашон занон мебошанд. Аъзои раёсат аз ду номзад ба раиси шуъба Нуъмонҷон Очиловро, ки то имрӯз сарпарастии шуъбаро баҷо меовард, раиси шуъбаи ҲНИТ дар шаҳри Хуҷанд интихоб карданд», - гуфта мешавад дар иттилои сомона.

Қобили зикр аст, ки дар шаҳри Хуҷанд 1032 нафар наҳзатиён фаъолият доранд, ки аз онҳо  40 дарсадро бонувон ташкил медиҳанд.

Зимнан зикр мегардад, ки дар кори конфронс ҳайати ҲНИТ иборат аз Воҳидхони Қосиддин, раиси дастгоҳ,  Саидиброҳими Муҳаммадназар ва Зурафо Раҳмонӣ мушовирони раиси ҲНИТ ва раиси бахши занони ҲНИТ Парвина Иброҳимзод иштирок доштанд.