Дар Душанбе вазири корҳои хориҷии Ҷумҳурии Тоҷикистон Ҳамрохон Зарифӣ нусхаи Эътимодномаи Сафири Фавқулода ва Мухтори Зеландияи Нав дар Ҷумҳурии Тоҷикистон Ҳамиш Куперро қабул намуд.

Зимни мулоқот ҷонибҳо масоили ҳолат ва дурнамои ҳамкориҳои дуҷониба ва бисёрҷонибаро мавриди муҳокима қарор дода, роҷеъ ба вазъият дар минтақа ва ҷаҳон табодули назар карданд. Кӯшиши тарафайн ҷиҳати ташкили мулоқотҳои дуҷониба дар сатҳи олӣ, инчунин дар доираи созмонҳои байналмилалӣ иброз карда шуд.

Вазири корҳои хориҷии Тоҷикистон мавҷудияти имконоти васеъро барои ҳамкориҳои дуҷониба махсус қайд сохт. Ҳамчунин ҳавасмандии ҷониби Тоҷикистон оид ба рушди ҳамкории мутақобилан судманд дар соҳаҳои мухталиф бо Зеландияи Нав таъкид гардид. Дар ин бора торнамои расмии ВКХ ҶТ хабар медиҳад.