Дар маъракаи интихоботи президенти Тоҷикистон, ки ба санаи 6-уми ноябри соли равон таъин шудааст, аз иштироки беш аз 700 нафар нозирони байнулмилалӣ интизорӣ меравад.

Тавре ба ОИ «Азия-Плюс» роҳбари маъмурияти КМИР Абдуманнон Додоев хабар дод, айни замон даъват ва мувофиқаи рӯйхатҳои намояндагони созмонҳои байнулмилалӣ ба сифати нозирон дар маъракаи интихоботи президенти Тоҷикистон идома дорад.

«Мо аз иштироки гурӯҳи нозирон аз Созмони амнияту ҳамкории Аврупо (САҲА), Иттиҳоди Давлатҳои Мустақил (ИДМ) ва Созмони ҳамкории Шанхай (СҲШ) интизорӣ дорем», - гуфт ӯ.

Номбурда хотиррасон намуд, ки дар интихоботи парлумонии соли 2010 дар Тоҷикистон 536 нафар нозирони байнулмилалӣ, аз ҷумла 254 намояндаи САҲА, 167 намояндаи ИДМ, 17 намояндаи СҲШ ва 86 намояндагони корпусҳои дипломатӣ ширкат варзиданд. «Дар интихоботи парлумонӣ беш аз 25 ҳазор нозирони маҳаллӣ ширкат варзида, дар интихоботи президентӣ шумори онҳо ба таври қобили мулоҳиза хоҳад афзуд», - иброз дошт номбурда.