Чанде қабл нимаи дуюми рӯз нахуствазири Тоҷикистон Оқил Оқилов дар иҷлосияи 68-уми Маҷмаъи кулли СММ суханронӣ намуд.

Тавре ба ОИ «Азия-Плюс» сармушовири хадамоти матбуоти президенти кишвар Субҳиддин Муҳиддинов аз Ню-Йорк хабар дод, дар суханронии худ Оқилов таваҷҷуҳи ҳозиринро ба мушкилоти мавҷуда дар соҳаи истифодаи об дар минтақаи Осиёи Марказӣ ҷалб намуда, таъкид дошт, ки Тоҷикистон ҳамеша ҷонибдори амалисозии қарордодҳои байнулмилалӣ дар соҳаи об буда, баҳри ҳифзи захираҳои обии минтақа тадбирҳои таъҷилӣ хоҳад андешид.

«Оқилов аз иштирокчиёни иҷлосия даъват ба амал овард, ки ташаббусҳои президенти Тоҷикистон дар мавриди таҳияи дурнамои ҳамкориҳо дар соҳаи об пас аз соли 2015-ро дастгирӣ намоянд», - зикр кард Муҳиддинов.

Ба қавли ӯ, нахуствазири ҷумҳурӣ ҳамчунин кӯшишҳои Тоҷикистон дар масъалаи таъмини доимии аҳолӣ бо нерӯи барқро таъкид намуда, иброз дошт, ки рушди ҳамкориҳои давлатҳои минтақа дар азхудкунии захираҳои гидроэнергетикӣ ба сулҳу созиш дар Афғонистон мусоидат карда метавонад.

«Оқилов дар суханрониаш инчунин ҳамкориҳои кишварҳои дунё дар самти мубориза бо терроризм, ифротгароӣ, муомилоти ғайриқонунии маводи мухаддир ва таъмини амният дар минтақаи Осиёи Марказиро муҳим арзёбӣ намуд», - афзуд Муҳиддинов.