Рӯзи 26-уми сентябри соли ҷорӣ дар Намояндагии доимии Тоҷикистон дар СММ дар Ню-Йорк муовини вазири корҳои хориҷии Тоҷикистон Низомиддин Зоҳидов бо ёвари котиби давлатии ИМА дар масъалаҳои Осиёи Марказӣ ва Ҷанубӣ Роберт Блейк ва Фиристодаи вежаи Департаменти давлатии Иёлоти Муттаҳидаи Амрико дар масъалаҳои боздоштгоҳи Гуантанамо Клиф Слоан мулоқот анҷом дод.

Бино ба иттилои Вазорати корҳои хориҷии ҷумҳурӣ, дар мулоқот масоили муносибатҳои дуҷонибаи Тоҷикистону ИМА мавриди муҳокима қарор гирифта, омодагии тарафайн ба идома ва густариши бештари ҳамкорӣ байни ду кишвар таъкид гардид.

Ба иттилои манбаъ, дар ҳошияи мубоҳисаҳои умумии иҷлоси 68-уми Маҷмаи Умумии СММ ҳамчунин Низомиддин Зоҳидов бо муовини вазири корҳои хориҷии Гурҷистон Давид Залкалианӣ гуфтушунид кард.

Гуфта мешавад, дар ҷараёни он мулоқот масъалаҳои густариши муносибатҳои дуҷониба, ҳамкории ду кишвар дар арсаи байналмилалӣ ва масъалаҳои минтақавии мавриди эҳтимоми тарафайн баррасӣ шуданд.