Субҳи имрӯз Президенти кишвар Эмомалӣ Раҳмон барои шиносоии бевосита бо вазъи зиндагии мардум ва ифтитоҳи як зумра иншооти иҷтимоию фарҳангӣ ва иқтисодӣ ба шаҳри Ваҳдат ташриф овард.

Бино ба иттилои хадамоти матуботи сарвари давлат, дар ҷараёни ин боздиди корӣ як бинои панҷқабатаи истиқоматӣ ва бинои Кохи маърифат ифтитоҳ ёфта, ба сохтмони чанд иншооти дигар оғоз бахшида мешавад.

Сарвари давлат Эмомалӣ Раҳмон, ҳамчунин аз гимназияи хонандагони болаёқати ба номи Балъамӣ дидан карда, бо шароити таълиму тарбияи насли наврас бевосита шинос мешавад.

Ҳадафи дигари боздиди корӣ шиносоӣ бо фаъолияти кишоварзони Ваҳдат, аз ҷумла дар самти истифодаи босамари заминҳои корами обӣ тавассути ба роҳ мондани кишти такрории зироатҳо мебошад.

Зимни ин боздид Президенти кишвар Эмомалӣ Раҳмон, ҳамчунин бо роҳбарияту фаъолони шаҳри Ваҳдат доир ба натиҷаҳои фаъолияти онҳо дар 9 моҳи соли 2013 ва вазифаҳои оянда машварати васеи корӣ ба роҳ мемонад.