Муовини раиси Ҳизби сотсиал-демократии Тоҷикистон, доктори улуми ҳуқуқшиносӣ Шокирҷон Ҳакимов бар ин назар аст, ки КМИР ба баррасии масъалаи дароз кардани муҳлати ҷамъоварии имзоҳо ба ҷонибдории номзадҳо ҳуқуқ надорад.

Дар ҷаласаи навбатии Иттиҳоди нерӯҳои ислоҳотхоҳи Тоҷикистон (ИНИТ) дар ин робита ӯ зикр кард, ки «муҳлат барои он дароз карда мешавад, ки сипас раҳбарии кишвар ба Маҳмадсаид Убайдуллоев супурда шавад». «Ҳатто агар ба КМИР бо чунин дархост муроҷиат карда бошанд ҳам, он набояд қабул мешуд, зеро ин мухолифи қонун аст», - иброз дошт ӯ.

Ш.Ҳакимов мутмаин аст, ки барои роҳ надодан ба қонушиканӣ, ИНИТ бояд аз иштироки минбаъда дар ин раванд даст кашида, ба интихобот таҳрим (бойкот) эълон кунад, «зеро имрӯз барои маҳрум кардани мардум аз интихоботи демократӣ монеъаҳои гуногун эҷод шудаанд».

«Мувофиқи қонун «Дар бораи интихоботи президенти ҶТ», пешбарии номзадҳо то 50 рӯз аз санаи интихобот оғоз гардида, на дертар аз 30 рӯз то ин сана ба анҷом мерасад, яъне 7-уми октябр ин муҳлат ба охир расид. Мутаносибан КМИР ба риоя накардани ин муқаррароти қонун ҳуқуқ надорад. Ман дастгирӣ намудан аз эълони таҳримро пешниҳод мекунам, зеро барои баргузории интихоботу шаффофу демократӣ ҳеҷ шароите мавҷуд нест. Ҳозир чун дар давраи Раҳмон Набиев муҳлатро дароз мекунанд ва Маҳмадсаид Убайдуллоев иҷрокунандаи вазифаи сарвари давлат шуда, корҳои муайяне анҷом дода мешаванд. Сарвари давлат аллакай аз аксари манотиқи ҷумҳурӣ боздид намуда, бисёре аз ин сафарҳо ба интихобот марбут буданд. Номзадҳои дигар чунин имконият надоранд ва идомаи ин маърака ҳеҷ маъние надорад», - зикр кард Ҳакимов.

Дар ҷаласа зикр гардид, ки дар қонун муҳлати бақайдгирии номзадҳо муқаррар шудааст, ки «дар муддати се рӯз аз замони расидани ҳуҷҷатҳои зарурӣ ва на дертар аз 25 рӯз то интихобот» амалӣ мешаванд. «Дар қонун муҳлати ҷамъоварии имзоҳо муайян нашуда, дар бораи муҳлати бақайдгирии номзадҳо сухан меравад, ки ин муҳлат ҳоло риоя мешавад», - гуфт дар ин робита раиси ҲНИТ Муҳиддин Кабирӣ.

Дар натиҷа иштирокчиёни ҷаласа ба хулоса расиданд, ки ин қарор аз ҷониби КМИР қабул шуда, масъулияташ ҳам пурра ба дӯши он вогузор аст. Дар ин робита бо аксари кулли овозҳо тасмим гирифта шуд, ки ба ҷараёни ҷамъоварии имзоҳо ба ҷонибдории номзади ягона идома дода мешавад.