Раиси палатаи болоии парлумони ҷумҳурӣ Маҳмадсаид Убайдуллоев сафири Эрон дар Тоҷикистон Алиасғари Шеърдӯстро, ки ваколатҳояш дар кишвари мо ба итмом мерасанд, ба ҳузур пазируфт.

Тавре ба ОИ «Азия-Плюс» Шавкат Саидов, ёвари раиси Маҷлиси миллии Маҷлиси Олии ҶТ хабар дод, М.Убайдуллоев ба сафир барои кори пурмаҳсули дипломатиаш дар Тоҷикистон изҳори миннатдорӣ намуда, таъкид дошт, ки Тоҷикистону Эронро ҳалқаҳои ягонаи фарҳангиву таърихӣ, забонӣ ва дӯстиву бародарӣ бо ҳам мутттаҳид месозанд.

Зимни мулоқот раиси палатаи болоии парлумони кишвар изҳори итминон кард, ки минбаъд низ ҳамкориҳои мутақобилан судманди Тоҷикистону Эрон дар бахшҳои иқтисоду тиҷорат, илму фарҳанг ва дигар самтҳо ба манфиати ҳарду кишвар густариш хоҳанд ёфт.

Дар навбати худ А.Шеърдӯст ба намояндагони парлумони Тоҷикистон барои фаъолияти муштарак дар рушди ҳамкориҳои дуҷониба арзи сипос намуда, таъкид кард, ки ӯ минбаъд низ ба рушди ҳамкориҳои кишварҳои дӯсту бародар дар тамоми ҷабҳаҳо мусоидат хоҳад кард.