Комиссияи марказии интихобот ва раъйпурсӣ (КМИР)-и Тоҷикистон бароои баррасии ҳуҷҷатҳои аз ҷониби ситоди Бобоназарова пешниҳодшуда омода буд. Дар ин бора имрӯз зимни нишасти хабарӣ раиси КМИР ҶТ Шермуҳаммади Шоҳиён хабар дод.

Ӯ таъкид дошт, ки дар доираи қонуни конститутсионӣ дар бораи интихобот номзади пешбаришуда ба мансаби президентӣ бояд 210 ҳазор имзои интихобкунандагонро ба ҷонибдориаш ҷамъоварӣ менамуд, вале бино ба маълумоти ситоди Бобоназарова ба тарафдории ӯ каме бештар аз 201 ҳазор имзо ҷамъоварӣ шуда буд.

Дар ҳамин ҳол, раиси КМИР зикр кард, ки агар аз ҷониби ситоди Бобоназарова ҳуҷҷатҳои дар даст доштаашон пешниҳод мегардиданд, онҳо дар давоми рӯз тибқи тартиботи муқаррашуда баррасӣ шуда, аз рӯйи онҳо қарори дахлдор қабул мегардид, вале раиси КМИР дар бораи кадом қарор сухан рафтанро мушаххасан нагуфт.

Тавре қаблан хабар дода будем, номзади пешбаришуда аз ҲНИТ ОйниҳолБобоназарова шумори зарурии имзҷамъовари карда натавониста, аз маъракаи интихоботӣ хориҷ шуд.

Ҳамин тариқ, айни замон аз 7 номзади пешбаришудаи аҳзоб ба мақоми президенти Тоҷикистон 6 нафар ба қайд гирифта шуданд. Инҳо президенти амалкунандаи ҷумҳурӣ Эмомалӣ Раҳмон, намояндаи Ҳизби аграрӣ академик Толиббек Бухориев, раиси Ҳизби ислоҳоти иқтисодӣ Олимҷон Бобоев, муовини раиси Ҳизби коммунист Исмоил Талбаков, раиси Ҳизби сотсиалистӣ Абдуҳалим Ғаффоров ва раиси Ҳизби демократии Тоҷикистон Саидҷаъфар Исмонов мебошанд.