Аксияи ташкилоти ҷавонони «Созандагони Ватан»-и ҲХДТ «Президенти ман» дар Кӯлобро тағйир дода, вохӯрии ҷавонони ҷонибдори ҲХДТ – донишҷӯёни Донишгоҳи давлатии Кӯлоб ва филиали Донишгоҳи технологии Тоҷикистон дар Кӯлобро созмон доданд.

Бино ба маълумоти расида ба хабарнигори ОИ «Азия-Плюс», манъи баргузории чорабиниҳои ҳадафнок бо мақсади таблиғоти сарвари давлат аз ҷониби худи Эмомалӣ Раҳмон сурат гирифтааст.

Ба қавли роҳбари Кумитаи ҷавонони ҳизб дар Донишгоҳи давлатии Кӯлоб Самандар Абдуллоев, беш аз 800 нафар донишҷӯён бидуни аксҳои президент ва танҳо бо шиорҳои ҲХДТ дар даст ба масофаи 2 километр ба назди донишҷӯёни филиали Донишгоҳи технологии Тоҷикистон дар Кӯлоб роҳпаймоӣ намудаанд.

«Бо ҳамсолонамон, аъзои ҲХДТ аз наздик шинос шуда, амалҳои минбаъдаи муштаракамонро ҳамоҳанг месозем», - афзуд С.Абдуллоев. 

Дар Қурғонтеппа ҳам дар ин рӯз аксияи «Президенти ман» бо иштироки хонандагони мактаб гузашт.