Зимни сафар ба Давлати Қатар раиси Ҳизби наҳзати исломии Тоҷикистон, вакили палатаи поёнии парлумон Муҳиддин Кабирӣ бо роҳбари Иттиҳоди мусалмонони ҷаҳон, яке аз олимони маъруфи ҷаҳони ислом Юсуф Карзовӣ мулоқот кард.

Тавре ба ОИ «Азия-Плюс» муовини раиси ҲНИТ Маҳмадалии Ҳайит хабар дод, дар мулоқот атрофи масоили марбут ба вазъ дар минтақаи Осиёи Марказӣ ва ҳамчунин интихоботи президентии ба рӯзи 6-уми ноябр дар Тоҷикистон таъиншуда табодули назар сурат гирифт.

«Юсуф Карзовӣ аввалин фақеҳи исломист, ки тибқи фатвои ӯ, ба занони мусулмон барои интихоб шудан ба мансаби президент ва вакилони парлумон ҳуқуқ дода шуд», - гуфт муовини раиси ҲНИТ.

Ба қавли ӯ, ҳадафи аслӣ аз сафари Кабирӣ ба Қатар иштирок дар кори Конгресии 19-уми умумиҷаҳонии федератсияи ганбол аст, зеро раиси ҲНИТ раиси Федератсияи гандболи Тоҷикистон мебошад.

«Дар анҷоми сафар Муҳиддин Кабирӣ ба назди ду нафар фарзандаш ба Туркия меравад, ки он ҷо таҳсил доранд ва дар рӯзи интихобот, 6-уми ноябр ӯ дар ҷумҳурӣ ҳузур нахоҳад дошт», - афзуд М.Ҳайит.