Номзади Ҳизби коммунисти Тоҷикистон Исмоил Талбаков ба пирӯзии худ дар интихоботи имрӯзаи президентӣ мутмаин аст.

«Пинҳон намекунам, ки имрӯз ба ҷонибдории хеш раъй додам», - гуфт дар мусоҳиба ба хабарнигори ОИ «Азия-Плюс» пас аз овоздиҳӣ дар мактаби таҳсилоти умумии №1-и пойтахт Исмоил Талбаков. Ӯ чунин мешуморад, ки барои сулҳу субот, дӯстиву ваҳдат ва шукуфоии кишвар овоз додааст.

Номбурда ҳамчунин гуфт, ба пирӯзии худ дар интихобот мутмаин аст, зеро платформаи пешазинтихоботии ӯ ба манфиати мардум нигаронида шуда, халқи заҳматкаш ба ӯ овоз хоҳанд дод.

«Онҳо ба хубӣ огаҳанд, ки танҳо амалисозии барномаи ман мушкилоти онҳоро ҳал месозад ва бовар дорам, ки ба ман овоз медиҳанд. Агар нахоҳанд ҳам, ин ҳуқуқи онҳост, бигзор чӣ гунае, ки мехоҳанд, зиндагӣ кунанд», - гуфт Талбаков.