Имрӯз президенти Тоҷикистон Эмомалӣ Раҳмон бо фармони худ вазири мудофиаи ҷумҳурӣ Шералӣ Хайруллоевро аз мансаб сабукдӯш намуда, ба ҷойи ӯ Шералӣ Мирзо, сардори Сарраёсати нерӯҳои марзбониро ба ин вазифа таъин намуд. Дар ин бора ба ОИ «Азия-Плюс» котиби матбуотии сарвари давлат Абдуфаттоҳ Шарифзода хабар дод.

Ӯ зикр кард, ки президент барои хизматҳои шоиста дар ин мансаб ба Шералӣ Хайруллоев миннатдорӣ изҳор намудааст. Котиби матбуотии сарвари давлат аз пешниҳоди маълумот дар бораи минбаъд ба кадом вазифа таъин шудани собиқ вазири мудофиа худдорӣ варзид.

Қобили зикр аст, ки  Шералӣ Хайруллоев аз соли 1995 ин мансабро ишғол мекард. Санаи 8-уми ноябри соли равон ӯ 64-сола шуд.