Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Латвия Андрис Берзинш дар робита ба хароб шудани як маркази тиҷоратӣ дар шаҳри Рига, ки ба ҳалокати даҳҳо нафар оварда расонид, барқияи тасаллият ирсол намуд.

Бино ба иттилои хадамоти матбуоти сарвари давлат, дар барқияи тасаллияти сарвари давлати Тоҷикистон аз ҷумла зикр мегардад, ки «аз хабари хароб шудани як маркази тиҷоратӣ дар шаҳри Рига ва ҳалокати даҳҳо нафар ниҳоят андӯҳгин шудам ва орзумандам, ки осебдидагони ин фоҷиа ҳар чӣ зудтар шифои комил ёбанд».

Бино ба маълумоти ахири Хадамоти давлатии оташнишонӣ ва наҷотдиҳии Латвия, шумори ҳалокшудагон бар асари хароб шудани бинои маркзи тиҷоратии Maxima дар шаҳри Рига то 53 нафар расида, ҳамчунин 40 нафари дигар осеб дида, 29 тан аз онҳо дар бемористон бистарианд.