Дар робита ба вазъи ахиран ноороми Украина раиси ҲКТ, вакили парлумон Шодӣ Шабдодов изҳор кард, ки иштибоҳоти мунтазами Маскав ва Киев ба ин вазъи муташанниҷ боис гардид.

Ба қавли ӯ, буҳрони сартосарӣ ва дурударози тамоми паҳнои Иттиҳоди Аврупоро фарогирифта, онҳоро водор месозад, ки ҷиҳати раҳо ёфтан аз ин вазъ захираҳои нави аграрӣ ва табиӣ дарёфт кунанд ва Украинаи ҳамсояи наздик аз ин захираҳо бархӯрдор аст, вале дар асл бошад, «Украинаро дар Иттиҳоди Аврупо касе ҷиддӣ интизор нест».

«Ғайр аз ин, бозиҳои аз мантиқ дури мақомоти раҳбарии Украина бо Иттиҳоди Аврупо ба буҳрон дар худи Киев боис шуданд. Дар ин ҳолат президенти Украина Виктор Януковичро лозим буд, ки ҷиҳати муайян кардани сатҳи ҳамкории кишвараш бо ИА ва кишварҳои узви Иттиҳоди Гумрукӣ (Русия, Белорус ва Қазоқистон) раъйпурсӣ гузаронида, дар қабули қарорҳои минбаъда ба он такя кунад», - мутмаин аст раиси ҲКТ.