Рӯзи 19 декабри соли 2013 Вазири корҳои хориҷии Тоҷикистон Сироҷидин Аслов Сафири Шоҳигарии Муттаҳидаи Британияи Кабир ва Ирландияи Шимолӣ Робин Орд-Смитро ба ҳузур пазируфт.

Бино ба маълуомти Вазорати корҳои хориҷии ҷумҳурӣ, дар оғози мулоқот Сафири Британияи Кабир Вазири корҳои хориҷиро бинобар таъин гардиданаш ба ин вазифа табрику таҳният гуфта, муваффақиятҳо дар адои фаъолияти кориаш таманно кард.

Вазири корҳои хориҷӣ сатҳи хуби ҳамкориҳоро миёни ду кишвар қайд намуда, изҳори умедворӣ аз рушди минбаъдаи онҳо кард. Вазир таваҷҷуҳи мусоҳибро ба зарурати густариши алоқаҳои иқтисодӣ-тиҷоратии Тоҷикистон ва Британияи Кабир ва инчунин ба сармоягузории соҳаҳои афзалиятноки кишвар ҷалб намуд. Вазир аҳамияти ҳамкориҳо ва саъю талошҳои муштаракро оид ба Афғонистон қайд кард.

Дар навбати худ, Сафири Британияи Кабир Орд-Смит вазъи муносибатҳои дуҷонибаро баланд арзёбӣ намуда, изҳори ҳамфикрӣ ба нуқтаи назари Вазири корҳои хориҷӣ ҷиҳати рушди ҳамкориҳои иқтисодӣ намуд.

Мусоҳибон инчунин масъалаҳои ҳамкории ду давлатро дар чаҳорчӯбаи ташкилотҳои байналмилалӣ муҳокима намуданд.

Худи ҳамин рӯз мулоқоти Вазири корҳои хориҷии Ҷумҳурии Тоҷикистон Сироҷиддин Аслов бо Сафири Ҷумҳурии Озарбойҷон Аббосалӣ Гасанов баргузор гардид.

Зимни мулоқот ҷонибҳо ҳолат ва дурнамои робитаҳои дуҷониба дар соҳаҳои сиёсӣ, тиҷоратӣ, иқтисодӣ ва фарҳангиву гуманитариро мавриди муҳокима қарор доданд.

Ҳавасмандии ҷонибҳо перомуни таҳкими ҳамкориҳо дар соҳаҳои мухталифи мавриди таваҷҷуҳи тарафайн изҳор карда шуд.