Чанде қабл дар иҷлосияи Маҷлиси вакилони халқи ноҳияи Шоҳмансури пойтахт номзадии президенти Академияи илмҳои Тоҷикистон Фарҳод Раҳимов ба вакилии Маҷлиси миллии Маҷлиси Олии Тоҷикистон пешбарӣ шуд .

Тавре ба ОИ «Азия-Плюс» роҳбари дастгоҳи Комиссияи марказии интихобот ва раъйпурсӣ (КМИР)-и Тоҷикистон Абдуманнон Додоев хабар дод, ҳамин тариқ маъракаи пешбарии номзадҳо ба аъзогии палатаи болоии парлумони ҷумҳурӣ ба ҷойи вакилони хориҷшуда ба итмом расида, ҳамаи номзадҳои пешбаришуда имрӯз аз ҷониби комиссияҳои интихоботии ҳавзаҳо ба қайд гирифта мешаванд.

Ёдрас мекунем, ки номзадии раисони вилоятҳои Суғду Хатлон ва ВМКБ Абдураҳмон Қодирӣ, Давлатшо Гулмаҳмадов ва Шодихон Ҷамшед низ ба вакилӣ дар Маҷлиси миллии Маҷлиси Олии Тоҷикистон пешбарӣ шуд.

Қаблан раисони ноҳияҳои Дарвозу Рӯшони ВМКБ Саидбурҳон Абдураҳмонов ва Худоёр Худоёров ба номзадии вакили Маҷлиси миллии Маҷлиси Олии Тоҷикистон пешбарӣ шуданд.

Қобили зикр аст, ки дар иҷлосияи шонздаҳуми Маҷлиси миллии Маҷлиси Олии Тоҷикистон, ки 17-уми декабри соли ҷорӣ баргузор шуд, 9 нафар аъзои палатаи болоии парлумони ҷумҳурӣ ба истеъфо рафтанд.

Собиқ раисони вилоятҳои Суғду Вилояти Мухтори Кӯҳистони Бадахшон Қоҳир Расулзода ва Қодири Қосим ва Хайрулло Асоев бинобар сабаби ба мансабҳои нави давлатӣ таъин шуданашон дар ҳайати ҳукумат ваколатҳои худ дар Маҷлиси миллиро супурданд.

Ҳамчунин собиқ раиси Академияи улуми ҶТ Мамадшо Илолов, собиқ раиси шаҳри Норак Ҳамид Абдуллоев, собиқ раиси вилояти Хатлон Ғайбулло Афзалов, собиқ раиси шаҳри Турсунзода Давлатшо Гулмаҳмадов, собиқ раиси ноҳияи Рӯшон Қобиламо Ғулошоева ва собиқ раиси ноҳияи Дарвоз Шамсмуҳаммад Назриев низ бо хоҳиши худ аз сафҳои палатаи болоии парлумон хориҷ гардиданд.

КМИР Тоҷикистон интихоботи вакилон ба ҷойи аъзои хориҷшудаи Маҷлиси намояндагон ва Маҷлиси миллии Маҷлиси Олии Тоҷикистонро санаи 15-уми феврали соли 2014 таъин кард.