Ахири ҳафтаи гузашта дар ташкилоти ибтидоии «Маорифчиён»-и назди Кумитаи иҷроияи ҲХДТ дар шаҳри Кӯлоб ба 60 нафар ҷавонони довталаб шаҳодатномаҳои ҳизбӣ супорида шуд.

Бино ба иттилои сомонаи расмии ҲХДТ, дар маҷлиси ташкилоти ҳизбии ин шаҳр аз фаъолият дар соли 2013 натиҷагирӣ шуда, нақшаву вазифаҳо барои соли равон муайян карда шуданд.

«Соли равон бо мақсади таблиғи васеъи сиёсати пешгирифтаи Раиси ҲХДТ, Президенти кишвар муҳтарам Эмомалӣ Раҳмон, тақвият бахшидани робита бо зинаҳои поёнии ҳизб ва омодагиҳои ҷиддӣ гирифтан ба истиқболи 20-солагии ҲХДТ як силсила чорабиниҳо гузаронида мешаванд», - омадааст дар хабари сомонаиҲХДТ.

Ҳизби халқии демократии Тоҷикистон соли 1994 таъсис ёфта, айни замон шумори аъзои он беш аз 237 ҳазор нафарро ташкил медиҳад. Ҳудуди 40 дарсади аъзои ҳизб ҷавонон мебошанд. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҳамин ҳизбанд.