Раиси Кумитаи МНМО ҶТ оид ба умури байнулмилалӣ, иттиҳодлияҳои ҷамъиятӣ ва итттилоот Олим Салимзода дар ҷаласаҳои зимистонаи Ассамблеяи парлумонии Созмони амнияту ҳамкории Аврупо (САҲА), ки имрӯз дар шаҳри Вена ба кор шурӯъ мекунад, ширкат хоҳад варзид.

Тавре ба ОИ «Азия-Плюс» котиби матбуотии палатаи поёнии парлумони ҷумҳурӣ Муҳаммадато Султонов хабар дод, дар ин ҷаласаҳо баррасии масоили рушди ҷомеаи полиэтникӣ ва бисёрфарҳангӣ дар минтақаи САҲА, роҳу воситахои паси сар намудани буҳрони моливу иқтисодии ҷаҳонӣ ва ҳамчунин нақши ВАО дар таъмини идоракунии пурсамар дар назар аст.

«Дар доираи иштирок дар кори ҷаласаҳо Олим Салимзода бо раҳбарияти Ассамблеяи парлумонии САҲА як қатор мулоқотҳо анҷом доданист, ки дар онҳо масоили таҳкими робитаҳои байнипарлумонӣ дар минтақаи САҲА мавриди баррасӣ қарор хоҳанд гирифт», - иброз дошт Султонов.

Ба гуфтаи ӯ, дар ҷаласаҳои зимистонаи Ассамблеяи парлумонии САҲА 130 нафар вакилон аз кишварҳои узви САҲА иштирок мекунанд.