Ҳукумати Қирғизистон алҳол дар бораи боз кардани гузаргоҳҳои марзӣ бо Тоҷикистон ба қарори ниҳоӣ нарасидааст.

Дар шарҳи маълумот дар бораи рӯзҳои 5-7-уми март боз шудани гузаргоҳҳои марзӣ бо Тоҷикистон муовини нахуствазири Қирғизистон Токон Мамитов ба АКИpress иброз доштааст, ки «ин тавр нест».

Ба гуфтаи муовини нахуствазири кишвари ҳамсоя, Тоҷиистон муддати зиёдест, ки ба ҳуқумати Қирғизистон бо дархости боз кардани гузаргоҳҳои марзӣ муроҷиат мекунад. «Аммо ҳукумати Қирғизистон ҳоло ба қарори ниҳоӣ нарасидааст. Ин масъала айни замон дар марҳилаи баррасӣ қарор дорад», - гуфтааст ӯ.

Ёдрас мекунем, ки рӯзи сешанбе аз ҳукумати ҷумҳурӣ ба ОИ «Азия-Плюс» иттилоъ доданд, ки имрӯз, 5-уми март Қирғизистон ҳамаи гузаргоҳҳои марзӣ бо Тоҷикистонро боз мекунад.

Ба иттилои манбаъ, аввали ҳафтаи равон дар ҷаласаи комиссияи байниҳукуматии Тоҷикистону Қирғизистон оид ба таъин ва аломатгузорӣ дар марзи давлатӣ дар Душанбе ҷонибҳо дар ин бора тавофуқ ҳосил карданд.

Ёдрас мекунем, ки пас аз муноқишаи мусаллаҳонаи рӯзи 11-уми январ дар марзи давлатии Тоҷикистону Қирғизистон, ки ду нафар марзбони тоҷик ва 6 нафар намояндагони Қирғизистон захм бардоштанд, кишвари ҳамсоя якҷониба тамоми гузаргоҳҳои марзӣ бо Тоҷикистонро баста буд.