Имрӯз мулоқоти раиси Маҷлиси намояндагони Маҷлиси Олии ҶТ Шукурҷон Зуҳуров бо роҳбари Дафтари САҲА дар Душанбе, сафир Маркос Мюллер доир гардид.

Тавре ба ОИ «Азия-Плюс» котиби матбуотии МНМО ҶТ Муҳаммадато Султонов хабар дод, зимни мулоқот Шукурҷон Зуҳуров изҳор намудааст, ки Тоҷикистон саҳми САҲА дар рушди демократия, озодии баён, ҳимоя аз ҳуқуқҳои иносн дар минтақа, аз ҷумла дар кишвари моро баланд арзёбӣ мекунад.

«Раиси палатаи поёнии парлумони кишвар таъкид дошт, ки САҲА ба Тоҷикистон дар расидан ба сулҳу созиши миллӣ, бозгашти гурезагони тоҷик аз Афғонистон, таҳкими марзи давлатӣ бо Афғонистон, рушди ҷомеаи шаҳрвандӣ ва ҳалли мушкилоти зистмуҳитӣ кӯмаки назаррас расонид», - зикр кард Султонов.

Ба гуфтаи ӯ, ҷонибҳо ҳамчунин қайд карданд, ки САҲА ва Тоҷикистон дар масъалаи ба узвияти Созмони ҷаҳонии тиҷорат пазируфта шудани Тоҷикистон, дар ҷумҳурӣ қабул шудани қонун «Дар бораи муқовимат бо коррупсия» муштаракона корҳои назаррасеро анҷом доданд.

«Сафир Мюллер таъкид намуд, ки САҲА минбаъд низ бо Тоҷикистон дар самти таҳкими робитаҳои байнипарлумонӣ, ба созиш расидан дар Афғонистон ва ҳалли мушкилоти озодии баён ҳамкорӣ карданист», - афзуд Султонов.